El plan de reindustrialización de Vesuvius diseñaráse nuna mesa técnica con alministraciones, empresa y trabayadores

De la mayor o menor intensidá de los alcuentros dependerá’l resultáu final

El plan de reindustrialización inxertu nel ERE de Vesuvius va diseñase na mesa técnica onde participen alministraciones, empresa y trabayadores. Tienen que poner enriba la mesa lo que tán dispuestos a aportar: tarrenos, instalaciones, ventayes fiscales, ayudes a la contratación, etc. En definitiva, apuntar les condiciones coles que se va alcontrar un hipotéticu comprador.

Una vegada completáu’l pliegu de venta pasaríase a la fase de prospección, xera que Vesuvius encargó a Lee Hecht Harrison, una consultora de recursos humanos especializada nestos procesos que yá s’encargó, por exemplu, de la reindustrialización de los astilleros vascos.

La consultora sedrá la encargada de buscar empreses o fondos d’inversión interesaos en retomar l’actividá industrial. Fontes de Vesuvius confirmen la so disponibilidá dafechu pa dir a la mesa técnica y entamar lo enantes posible’l trabayu, una vegada que yá se robló l’ERE.

L’otru plan afitáu nel alcuerdu ye’l social, que ye obligatoriu n’España pa empreses qu’apliquen un espediente de regulación de empléu sobre más de 50 trabayadores. La mesma consultora, Lee Hecht Harrison, va llevar alantre’l procesu qu’entamaría al día siguiente de la estinción de los contratos y acabará nueve meses dempués.

Consiste n’ayudar a los trabayadores afectaos polos despidos a alcontrar un nuevu trabayu según los sos perfiles y intereses personales. L’alcuerdu inclúi tamién a los sos familiares.

L’arzobispáu d’Uviéu, Jesús Sanz, pidió a la Casa Real que tenga "un xestu" pa los trabayadores de Vesuvius na so estancia n’Asturies pa la ceremonia d’entrega de los Premios Princesa d’Asturies 2019.