Gran esmolición en Salas pol anunciu del "cese d'actividá" de Danone

Los trabayadores axunten el martes cola empresa pa proponer un plan de viabilidá pa la planta

Con gran esmolición, vívese güei en Salas l'anunciu de zarru de Danone. Un "cese d'actividá", como comunicó la empresa, qu'afectó fondamente al conceyu. Nun hai naide en Salas yá que nun conoza l'anunciu de zarru de la factoría de Danone. A la gran mayoría de los vecinos, la noticia garrólos por sorpresa y toos coinciden nel palu que supón pa la economía de la contorna.

Sentir unánime nes cais de Salas. Ye la peor de les noticies pa la economía del conceyu. Non solo polos alredor de 80 puestos de trabayu directos, sinón por tola actividá indirecta que xenera y la falta d'otres alternatives.

Non solo na cai, desque se conoció la noticia, les redes sociales enllenáronse de mensaxes reivindicativos, col hastag NoalcierredeDanoneenSalas.

A la mayoría la noticia pillólos por sorpresa. Otros, ente ellos dellos ex-trabayadores de la factoría creeen que yá se vía venir, y hai quien nun tien duldes de que los problemes coles infraestructres de la zona tán detrás del anunciu.

El martes ta previstu un nuevu alcuentru ente la dirección y los representantes de los trabayadores, nel qu'estos postreros van plantegar un plan de viabilidá pa la planta. Pero les sensaciones en Salas son bien pesimistes y los vecinos creen que nun habrá vuelta atrás.

Los socialistes asturianos, presentes na manifestación, nieguen que'l fracasu de les negociaciones pa reformar l'estatutu recaya solo nellos, y repiten el so compromisu cola oficialidá de la llingua asturiana anque yá pa la próxima llexislatura. Plazu nel que coinciden con Izquierda Xunida, pero del que discrepa Podemos.