La depuradora de Llanes prueba con ésitu la reutilización de carbón activo pa desaniciar los golores de la planta

Un exemplu de valorización de residuos como los que promueve la Estratexa d'Economía Circular d'Asturies

El carbón activo úsase nes depuradores p'amenorgar los malos golores. Cuando'l carbón pierde la so eficacia, tírase. Agora consiguió refacese y volver usalo como si fuera nuevo polo menos tres ciclos más na depuradora de Llanes.

Dexa aforrar el 70% del gastu nesti material, anque nun ye lo único que se reaprovecha. Ye un exemplu de valorización de residuos como los que promueve la Estratexa d'Economía Circular d'Asturies, qu'acaba d'aprobase.

El mal golor vien de la folla que se saca al depurar l'agua. Tamién ye un residuu qu'acaba en Coxersa. Solo nesta planta de Llanes xenérense 600 tonelaes al añu, 80.500 en toles depuradores d'Asturies.

Pero les investigaciones demostraron que pue tresformase en carbón activo y usase como absorbente nel tratamientu d'agua residual, ente otros usos.

Esta planta pilotu forma parte d'un proyectu d'I+D financiáu pol Principáu y desenvueltu por Aqualia, les inxenieríes Ingemas y Biesca y la empresa de servicios informáticos ITC Sistemas, ente otres instituciones implicaes. Ye un exemplu d'economía circular: aprovechar al máximu los materiales p'amenorgar la cantidá de residuos.