La flota de cercu asturiana para énte les torgues pa distribuyir la mercancía

Les conserveres temen la xubida del preciu del aceite y el parón de la flota

Énte la imposibilidá de que la mercancía puea distribuyise, la flota de cercu de tol Cantábricu, inxertos los cinco barcos asturianos y dalgún volanteru, decidieron parar dende güei y hasta’l llunes qu’entra.

Esta mañana nun hubo rula y pa esta tarde hai duldes de si se rulará na de Xixón, porque entá nun saben si entrará dalgún barcu. Esta situación toca dafechu a la campaña de la xarda qu’acaba d’entamar.

Falta de veceros nes pescaderíes asturianes

A pesar d’esta situación xenerada pola fuelga, güei lo único que faltó nos mercaos fueron compradores, aseguren los comerciantes. Nes pescaderíes namás se notó menos cantidá y de dalgunos productos como l’anchoa.

D’otros como l’amasuela o’l muxón, que vien de Galicia, yá nun habrá más hasta’l vienres.

De cara al fin de selmana y si siguen los paros, sí creen qu’habrá problemes si se busquen productos mui concretos.​

Les conserveres temen la xubida del preciu del aceite y el parón de la flota

De los sectores productivos con duldes sobre l’actual situación güei fixámonos nes conserveres. A les puertes de la temporada fuerte con anchoa o bonitu, esmolez por exemplu la falta d’aceite, anque mayoritariamente n’Asturies úsase lo d’oliva.

Tamién el preciu de los envases o la electricidá, pero la principal incertidume ye qué fadrá’l sector pesqueru y el tresporte énte la medría del carburante.​

La fuelga del tresporte entama a parar obres públiques y privaes

El sector de la construcción entama a sufrir pol paru de tresportes. Entamen a parar les obres públiques y privaes, sobre manera les que tán nes primeres fases. Nun ta suministrándose formigón, cementu, asfaltu y otru tipu de materia prima.

La patronal pide que se tomen midíes porque d’allargarse esta situación, esto tendrá repercusiones nel preciu de la vivienda. Dende’l sector industrial, Asturiana de Zinc alvierte de que si la fuelga sigue, pue peligrar la continuidá de l’actividá de la planta.

Per parte de so, Mantequerías Arias sigue cola producción, pero almite que tien problemes pa unviar mercancía a dalgunos puntos d’España pola acción de los piquetes.