La ministra de Trabayu ve "señales" de solución pa les plantes d’Alcoa

"Esperemos que s’afite esa operación y que puea caltenese’l trabayu"

La ministra de Trabayu, Magdalena Valerio, aseguró que "hai señales de que les coses van por bon camín" na negociación p’alcontrar socios dispuestos a reentamar la xera de les fábriques de la multinacional del aluminiu Alcoa n’A Coruña y Avilés.

Valerio fizo estes declaraciones enantes de participar nuna xunta con mozos del conceyu de Lugo cola alcaldesa, Lara Méndez, y el secretariu xeneral de los socialistes gallegos, Gonzalo Caballero.

La ministra recordó que los trabayadores de les dos plantes que la multinacional de los Estaos Xuníos quier zarrar n’España, inxertos nun espediente de regulación de trabayu, confíen na mediación de les autoridaes pa favorecer la continuidá de los sos puestos de trabayu.

"Tán cumpliéndose les previsiones qu’había nesi espediente y el Ministeriu d’Industria ta mui aplicáu pa qu’haya una empresa que quede con Alcoa", dixo Valerio.

"Esperemos que s’afite esa operación y que puea caltenese’l trabayu y nun haya nengún trabayador o trabayadora d’Alcoa que puea vese perxudicáu por esta situación", afirmó