La venta de lleña xube nos últimos meses

El preciu del carbón cuadriplicóse nel últimu añu y, según los usuarios, ye "de peor calidá"

La venta de lleña xubió nos últimos meses. Hai más demanda pola medría nel preciu del combustible o la electricidá.

Sicasí, el preciu de la madera, que se compra yá picao y llisto, tamién medró porque los costos de producción asina lo ficieron.

Anque nun se sabe cómo de fríu y llargu sedrá l’iviernu, esti añu, tamién s’entamó a guardar lleña enantes, adelantando la compra al mes de xunetu.

El preciu del carbón cuadriplicóse nel últimu añu y, según los usuarios, ye "de peor calidá"

La situación ye asemeyada col carbón. Les empreses asturianes que vienden esti mineral aseguren que los precios cuasi se cuadriplicaron nel últimu añu. Si n’ochobre de 2021, una tonelada costaba 200 euros. Agora, sal por 700 ó 800 euros. Como consecuencia, dicen, les ventes cayeron en picao, inclusive enantes de que llegue’l fríu.

El pocu carbón que se saca n’España destínase a les térmiques y la guerra frenó les importaciones de Rusia y Ucraína, asina que tien que comprase mineral a otros países como Colombia o Perú, que xubieron tarifes.

Tuvimos na cocina d’Alfredo Merino, un mineru de Turón xubiláu. Asegura que guarda como un tesoru’l "vale del carbón" que-yos da Hunosa, pero esplica que’l mineral que llega agora ye de muchísima peor calidá; como "tierra", diz.