Les empreses de tresporte van dexar de prestar los sos servicios a ArcelorMittal

La compañía pide diálogu

Los tresportistes asturianos provisores d’ArcelorMittal van dexar de prestar los sos servicios el próximu 1 d'ochobre por desavenencies nel axuste de los precios que propón la siderúrxica, según informaron nun comunicáu les organizaciones del sector Asetra y Cesintra.

Tres les comunicaciones feches a la dirección de la compañía ArcelorMittal n'Asturies por parte de les asociaciones de tresporte y loxística asturianes, en relación al amenorgamientu de los precios propuesta "unillateralmente", y énte la falta de respuesta por parte de la compañía, los proveedores de tresporte de la compañía siderúrxica anunciaron oficialmente que van dexar de presta-y los sos servicios.

A finales d'agostu, dambes asociaciones unviaron una comunicación a ArcelorMittal n'Asturies manifestando'l so total desalcuerdu cola propuesta d'un amenorgamientu de precios del 5%, énte lo que nun llograron respuesta por parte de los responsables de la compañía.

Nuna xunta posterior, el día 10 de setiembre, les empreses afectaes por esta midida, una ventena de compañíes, autónomos y cooperatives asturianes, alcordaron unánimemente la paralización de la prestación de los sos servicios dende principios de mes, hasta que les condiciones primeramente alcordaes nos distintos contratos de servicios seyan anovaes.

Pela so parte, la compañía abrióse esti martes al diálogu coles empreses del tresporte qu'operen nes sos plantes y esplicó que se vio obligada al amenorgamientu de los costos d'esti serviciu pa contribuyir a la sostenibilidá de l'actividá nuna coxuntura de mercáu “abondo difícil”.