Les persones sordociegues, perxudicaes pola reforma llaboral

L'asociación Asturiana pide la reconocencia de la incapacidá única

Les persones sordociegues viéronse perxudicaes pola reforma llaboral. Una figura imprescindible pa ellos, la del guía intérprete, nun se tuvo en cuenta y obliga a les asociaciones a pagar más a la Seguridá Social por cuntar con estos profesionales, anque pa ellos caltiénse’l salariu.

L’asociación Asturiana, qu’inxerta esti colectivu, pide la reconocencia de la incapacidá única y ayudes a les alministraciones pa facer frente a la nueva normativa llaboral.

Daniela tien 38 años, ye sordociega y dende va munchu tiempu ta en búsqueda de trabayu ensin algamalu. Julia ye la guía intérprete que la acompaña pa facer múltiples funciones del so día a día, como xestiones alministratives, dir al médicu o a una entrevista llaboral.

Hai persones que, como ella, se vieron perxudicaes pola reforma llaboral, que nun piensa na necesaria presencia de los guíes intérpretes como acompañantes. Tamién denuncien la falta de la reconocencia de la sordoceguera como incapacidá única, lo qu’inxertaría midíes p’acceder al mercáu llaboral.

Cola reforma llaboral los guíes intérpretes cobren lo mesmo, pero les asociaciones vense obligaes a pagar más por tenelos a la Seguridá Social. Piden subvenciones a les alministraciones, pa poder siguir cuntando cola ayuda d'estos profesionales, y qu’ellos nun queden ensin trabayu.

N’España, calcúlase qu’hai unes 200.000 persones sordociegues. N’Asturies, anque falta facer un censu, calcúlase que sedrán al rodiu de 200 los afectaos.