Los comités d'empresa de Duro Felguera, optimistes tres l'anunciu de la SEPI

Los trabayadores consideren que'l rescate va dar enfotu a los sos veceros

Confírmase pa los comités d'empresa de Duro Felguera que la multinacional asturiana ye una empresa estratéxica y vidable. Destaquen que'l rescate de 120 millones d'euros y la entrada de la SEPI yá ta xenerando enfotu ente los sos veceros.

Hores dempués de l'autorización d'esta inyección de capital público, les acciones de Duro Felguera xubíen más d'un 16%.

Los sindicatos valoren que la compañía cunte con un nuevu equipu xestor y consideren que'l Principáu tendría que tar nel conseyu d'alministración, dempués d'anunciar que va ser accionista.

El siguiente pasu va ser la entrada d'un nuevu inversor. Un sociu industrial que desconocen pero que, dicen, taría detrás de la operación en marcha.

El plan pa salvar al grupu industrial tendrá que ser autorizáu'l próximu martes pol Conseyu de Ministros.​