Los emplegaos d'Alcoa esixen inversores que salven les factoríes

La 'marcha del aluminiu' llegó esta tarde a Lleón

Los trabayadores de la multinacional del aluminiu Alcoa alvirtieron esti sábadu en Lleón que si nun atopen un inversor vidable enantes del 30 de xunu despidiráse a dos terceres partes de los cerca de 300 trabayadores de les plantes d'Alcoa n'Avilés (Asturies) y Coruña (Galicia).

Unos 60 trabayadores d'Alcoa llegaron esta tarde a Lleón na nomada 'marcha del aluminiu' entamada'l pasáu xueves n'Asturies y que na so tercer etapa fizo'l percorríu ente'l llugar lleonés de La Robla y Lleón.

La marcha de protesta va acabar el próximu día 24 en Madrid nuna gran manifestación que va llegar hasta les puertes del Ministeriu d'Industria.

El presidente del comité d'empresa d'Alcoa Avilés, José Manuel Gómez de la Uz (CCOO), desplicó qu'anguaño "tenemos paraes les series d'electrolisis que ye la base de l'actividá granible y malapenes esiste una posibilidá d'inversión ensin garantíes de futuru pal cien por cien de la plantiya".