Maroto y Barbón comprométense a ayudar a Alcoa a afitar el so proyectu

De la Uz:"Van collaborar con nosotros n’ayudanos a buscar tolos nichos de negociu"

La ministra d’Industria, Comerciu y Turismu en funciones, Reyes Maroto, y el presidente del Gobiernu del Principáu, Adrián Barbón, comprometiéronse esti martes a ayudar a buscar tolos nichos de negociu afayadizos pa que’l proyectu pa la fábrica d’Alcoa s’afite na so nueva andadura.

El compromisu verbalizóse nun alcuentru nel Ayuntamientu d’Avilés ente dambos mandatarios, l’alcaldesa de la ciudá, Mariví Monteserín, y los representantes del comité d’empresa de la fábrica d’aluminiu.

"Tanto’l Ministeriu como’l Gobiernu d’Asturies tresmitiéronnos que van collaborar con nosotros n’ayudanos a buscar tolos nichos de negociu afayadizos pa qu’esta compañía tenga futuru nel Principáu", declaró’l presidente del comité d’empresa de la fábrica avilesina, José Manuel Gómez de la Uz, dempués de la xunta.

Nel alcuentru nun se faló del estatutu pa les empreses electrointensives, pero sí se tresmitió a los representantes de los trabayadores de l’aluminera que fai falta formar un nuevu Gobiernu pa impulsar esi proyectu pa la meyora de la competitividá de la industria.

Gómez de la Uz treslladó a la ministra’l so deséu d’alcontrar nichos de negociu suficientes pa que la factoría puea subsistir con tola plantiya nesta nueva etapa de la mano del fondu suizu Parter, que se fizo coles fábriques d’Avilés y A Coruña.