Webcams
Buscar
Problemes col aval torguen agora la compra d’Alcoa por Parter
La empresa fizo esta anuncia en Madrid nuna nueva xunta colos sindicatos
La dirección d’Alcoa diz agora que’l fondu inversor suizu Parter Capital nun cumple coles garantíes financieres afayadices pa la compra de les sos plantes d’Avilés y A Coruña, según avanzó’l presidente del comité d’empresa, José Manuel Gómez de Uz.
La empresa aluminera fizo esta anuncia en Madrid nuna nueva xunta colos sindicatos, qu’entovía nun acabó.
El procesu de venta tenía qu’acabar el domingu, 30 de xunu, cuando acaba’l plazu afitáu pal pieslle de les instalaciones y el despidu de los trabayadores.
La ufierta del fondu d’inversión suizu Parter Capital foi la única qu’aceptó la multinacional aluminera de los Estaos Xuníos dempués de refugar la del fondu alemán Quantum, precisamente por falta de garantíes financieres.
Parter garantizare 250 trabayadores nes dos fábriques -frente a los 317 colos que cunta la planta avilesina y los 369 de la coruñesa-, cantidá que podría xubir si s’arrancaren les series d’electrolisis.
El fondu suizu llegó a asegurar que quería quedar coles plantes más tiempu que los dos años a los que taba obligada según les condiciones afitaes nel procesu de venta.
Parter Capital señaló díes atrás que, si arrancaren les series d’electrolisis pa la producción d’aluminiu primario, podría inclusive contratase a más xente qu’esos quinientos que se prevén de mano.
El proyectu d’esti fondu inversor diba a centrase en productos industriales de gran valor amestáu venceyaos col sector aeronáuticu y automovilísticu, y non a la gama baxa de producción d’aluminiu.
