Webcams
Buscar
Fuerte presencia policial nos polígonos industriales
Fuerte presencia policial nos polígonos industriales na segunda xornada de la fuelga indefinida convocada pola minoritaria Plataforma pa la Defensa del Sector del Tresporte de Mercancíes en protesta polos altos precios del combustible.
Una iniciativa que nun sofita la mayor patronal del sector, la Confederación Española de Tresporte de Mercancíes (CETM), con 65.000 empreses y 260.000 vehículos, el 80% de la flota española.
N’Asturies, la fuelga ye sofitada por UITA y Cesintra, dos de les tres organizaciones mayoritaries xunto con Asetra, que nun la sofita.
El paru sigue siendo mui fuerte, malapenes salieron camiones del polígonu de Silvota. La policía tuvo qu’escoltar a un convói d’una empresa de comida pa que pudiere facer la so entrega.
Los piquetes tamién torgaron la distribución de los exemplares del diariu La Nueva España. Según informa’l periódicu na so páxina web, les furgonetes de repartu esperaben ayeri pela nueche a qu’acabare la tirada del periódicu na planta d’impresión cuando un piquete cortó-yos el pasu.
Pocu movimientu tamién en Mercasturies, d’onde namás salieron unos camiones d’una importante cadena de supermercaos.
En Xixón, n’El Musel, el siguimientu del paru ye prácticamente total. En Porceyo, un conductor que quixo evitar un piquete acabó arrollando a un vehículu de la Guardia Civil.
Según los convocantes, la primer xornada de fuelga celebrada ayeri llunes, provocó un parón cuasi total de l’actividá al haber una parada de cerca del 98% de los camiones.
