'Milton' dexa dos muertos y tres millones de persones ensin eletricidá

Más d'un millón de movíos y incontables daños pol furacán n'EEXX

El furacán Milton cute'l centru de Florida con grandes inundaciones y fuertes rabaseres de vientu tres tocar tierra na mariña oeste. Fízolo en Siesta Key a les 20:30 hora local. El fenómenu meteorolóxicu dexó numberosos daños y xeneró tornaos acomuñaos. Unu d'ellos costó-y la vida a polo menos dos persones nuna comunidá qu'alluga xubilaos nel condáu de St. Lucie.

Milton llegó a algamar la categoría 5 pero llegó a la mariña de los Estaos Xuníos na 3. Con too y con eso, el furacán provocó'l desplazamientu d'un millón de persones en Florida afalaes polos encamientos de les autoridaes.

El furacán tamién s'encargó d'apagar les lluces de los ciudadanos de Florida. Nos primeros minutos dexó ensin electricidá a cuasi un millón de persones y a midida que foi entrando en tierra la cifra xubió percima de los tres millones.

Los aeropuertos tamién se vieron afectaos. Cerráronse 10 y atayáronse más de 1000 vuelos.

Les lluvies acomuñaes al pasu de Milton establecieron records en cada llugar que tocó llegando a rexistrase n'hores cantidaes cimeres a la media añal. Esto traducióse n'inundaciones, xubíes del mar y daños materiales qu'entá nun se contabilizaron.

Dende esti mediudía, Milton, yá ta en categoría 1, avanza dirección a Cabu Cañaveral con vientos potencialmente destructivos qu'algamen los 135 km/h. Espérase que nes próximes hores abandone'l país pela mariña este.