Edmundo González proclámase presidente de Venezuela y llama al Exércitu a remontase escontra Maduro

Asegura que Nicolás Maduro dio un "golpe d'Estáu"

L'opositor venezolanu Edmundo González Urrutia, quien asegura ser el ganador de les elecciones de xunetu pasáu en Venezuela, afirmó esti vienres que ta "mui cerca" del so país, "llistu pal ingresu seguru", y sorrayó que Nicolás Maduro dio un “golpe d'Estáu" nesta xornada, cuando foi xuramentáu presidente pola Asamblea Nacional, controlada pol chavismu.

Nun mensaxe solemne a la nación tresmitíu pola rede social X, Edmundo González dixo que "güei en Caracas Maduro forzó la Constitución y la voluntá soberana de los venezolanos espresada'l 28 de xunetu y dio un golpe d'Estáu y autoproclamóse dictador. Nun lu acompaña'l pueblu, nun lu acompaña nengún gobiernu que se respete como democráticu solo los dictadores de Cuba, el Congu y Nicaragua", en referencia a los presidentes Miguel Díaz-Canel, Denis Sassou-N'Guesso y Daniel Ortega.

"Toi mui cerca de Venezuela, toi llistu pal ingresu seguru y, nel momentu afayadizu, voi faer valir los votos que representen la recuperación de la nuesa democracia", resaltó González Urrutia, exiliáu n'España dende setiembre pasáu.