Fracasu del segundu intentu p'habilitar los corredores humanitarios de Mariúpol y Volnovaja

Un millón y mediu de refuxaos en 10 díes, el mayor éxodu dende la Segunda Guerra Mundial

Nuevu fracasu del segundu intentu p’habilitar los corredores humanitarios pactaos en Mariúpol y Volnovaja.

Siguen los enfrentamientos ente acusaciones cruzaes de nun respetar l’altu’l fueu, qu’impidió la evacuación prevista pa güei. Médicos Sin Fronteras pide que se garantice urxentemente’l pasu seguru.

Mientres, na capital, sigue l’éxodu masivu de civiles. La ONU asegura que ye’l mayor éxodu dende la Segunda Guerra Mundial, con más d’un millón y mediu d’ucraínos refuxaos en 10 díes.

Les tropes de Putin siguen la so ofensiva en dellos frentes y el so avance en dirección Kiev. Asina un ataque aereu en Korostén destruyó cases, dexando dellos mancaos y polo menos un muertu.

Zelenski, el presidente ucraín, alertó de lo que denoma un nuevu crime de guerra. Asegura que les fuerces ruses tán preparándose pa bombardear la ciudá portuaria d’Odesa, a la vera del mar Negru.

Vladimir Putin asegura que ta dispuestu a negociar cola mediación de Turquía y el so presidente Erdogan.

Les esperances pa parar la invasión tán puestes nesti llunes, cuando ta prevista la tercer ronda de negociaciones na llende polaco-bielorrusa.