La invasión d'Ucraína trai a la memoria la guerra de los Balcanes

Nueve camiones cargaos con medicamentos, ropa y comida salíen de Xixón en 1993 rumbu a Croacia

La fola de solidaridá actual trai a la memoria otres asemeyaes desencadenaes tamién por guerres. En 1993, nueve trailers cargaos con medicamentos, ropa y comida salíen de Xixón rumbu a Croacia. Un viaxe de 3.000 kilómetros per tierra y mar p’ayudar a Bosnia na guerra de los Balcanes.

Les iniciatives solidaries qu’estos díes pónense en marcha p’ayudar a la población ucraína dende Asturies, traen a la memoria otres asemeyaes llevaes alantre en conflictos bélicos anteriores.

Ye’l casu del convói que s’entamó dende Xixón pa unviar medicamentos, comida y ropa a Bosnia na guerra de los Balcanes.

Ventinueve años pasaron d’aquella iniciativa impulsada pola ONG Aid Alianza Asturies. Convirtióse nel primer convói civil en prestar ayuda a los que daquella sufríen la violencia d’una guerra que, como l’actual, tamién causó un fuerte impactu en bona parte de la sociedá asturiana.

Lo qu’entamó siendo un proyectu destináu a unviar una furgoneta con medicamentos al hospital de Mostar, acabó convirtiéndose nuna marea solidaria ensin precedentes qu’acabó esbordando a los qu’aquellos díes trabayaron como voluntarios.

Vicente Díez Faixat foi ún de los voluntarios que llegó a Mostar pa entregar los medicamentos al so hospital. La ciudá y la so ponte simbolizaben yá l’horror de la guerra nos Balcanes.