Rusia ataca Ucraína

Miles d'ucraínos traten de fuxir del ataque rusu

El presidente rusu, Vladimir Putin, ordenó atacar Ucraína no que denomó como una operación militar especial. Operación que supunxo la invasión del país desne’l norte, per Bielorrusia y Rusia, y dende’l sur per Crimea.

L’oxetivu, según Putin, ye protexer a les persones de los territorios de Donetsk y Lugansk, na llende, de mayoría prorrusa y reconocíos por Moscú como parte de la so federación.

Sicasí, cientos de kilómetros al oeste, na capital d’Ucraína, Kiev, les serenes alertaben a la población d’ataques aéreos col soníu de les bombes de fondu.

Moscú fala d’ataques quirúrxicos sobre instalaciones militares o aeroportuaries ucraínes, como una base de Mariúpol. El gobiernu d’Ucraína caltién que, como en Járkov, los militares rusos atacaron a la población civil.

Población que s’apelotonó nos bancos pa sacar los aforros. Población que s’echó a la carretera pa buscar llugares más seguros nel oeste del país o inclusive fuera d’él. Rumania, Moldavia, Eslovaquia y Polonia entamaron a recibir a ucranínos que fuxen de les bombes.

El presidente d’Ucraína,Volodímir​ Zelenski, dio’l preste al repartu d’armes tamién ente civiles y alertó a los líderes europeos que de nun recibir ayuda agora, la guerra esparderáse pel continente hacia l’oeste.

En tol mundu celebráronse concentraciones en solidaridá col pueblu ucranín.