Trump suspende 30 díes tolos vuelos d'Europa a Estaos Xuníos

Italia cierra tolos negocios del país, sacantes los de primer necesidá

Donald Trump decretó la suspensión de los viaxes dende Europa a Estaos Xuníos per un períodu de 30 díes. Sacante'l Reinu Xuníu.

Ye una de les principales midíes alcordaes pa frenar la espansión del coronavirus n'Estaos Xuníos, onde yá hai 1.000 persones infestaes.

Trump acusó a la Xunión Europea d'empeorar la situación por nun tomar precauciones a tiempu.

Tamién anunció midíes económiques estraordinaries pa torgar l'impactu del virus.

Italia cierra tolos negocios del país, sacantes los de primera necesidá

Italia decretó'l zarru de toles actividaes comerciales sacantes les de primer necesidá, ente ellos los supermercaos, les tiendes d'alimentación y les farmacies y parafarmacies.

Tamién les gasolineres van tar abiertes y les fábriques y industries van poder siguir la so actividá si se garantiza la seguridá de los emplegaos.

Son les nueves midíes alcordaes pol Gobiernu italianu pa parar la epidemia de coronavirus. N'Italia, yá finaron más de 900 persones.

Pela so parte, en China, nes últimes hores, rexistráronse 31 nueves infecciones. Esto supón una llixera medría al respective de díes anteriores, que s'esplica polos casos importaos.

Corea del Sur rexistró ayeri'l menor númberu de positivos dende va tres selmanes.

El coronavirus yá ta en 127 países y contabilícense más de 120.000 casos en tol mundu.