Ataque a una base aérea a 25 kilómetros de Polonia con polo menos 35 muertos

La ofensiva más cercana a un territoriu OTAN dende l'entamu de la invasión

Rusia dobla la so amenaza al atacar esta madrugada una base militar a namás 25 kilómetros de la llende con Polonia. Según l'últimu recuentu, son 35 les persones muertes y 134 los mancaos. Hasta una trentena de misiles llanzaríense dende'l Mar Negru y Azov escontra esti oxetivu nel qu'habría instructores internacionales de la OTAN, según fontes ucraínes.

Les últimes noticies falen de 35 muertos y 134 mancaos. Polo menos 30 misiles llanzaos poles tropes ruses impactaben de madrugada escontra'l Centru Internacional pal Caltenimientu de la Paz y la Seguridá asitiáu nel llugar de Yavoriv. Ta a 40 kilómetros de Leópolis y a namás 25 kilómetros de la llende con Polonia, no que ye la ofensiva más cercana a un territoriu OTAN dende l'entamu de la invasión.

La mayoría de les quemes sedríen apagaes, mientres los servicios de rescate y técnicos n'esplosivos taríen desmantelando la mayoría de los escombros. Según fontes del gobiernu ucraín, na instalación había instructores internacionales qu'instruyíen a soldaos ucraínos.

Mientres, el presidente Zelenski aseguró que nes próximes hores la ciudá portuaria de Mariúpol, con
mediu millón d'habitantes, va tener ayuda humanitaria.

Nun videu reproducíu poles axencies ucraínes sostién que se ta faciendo tolo posible pa vencer la resistencia de los ocupantes. L'anunciu diose en plena ofensiva rusa nel este del país cola que trata d'embolsar a les tropes ucraínes.