El Día d'Europa reivindica la trescendencia de les decisiones comunitaries

El Parlamentu Européu faise una llamada a la participación nos próximos comicios

Xusto dientro d'un mes, el 9 de xunu, España va dir a les urnes pa escoyer a los sos representantes nel Parlamentu européu. Los 27 estaos miembros escueyen, ente'l 6 y el 9 de xunu, a 720 eurodiputaos. España, con 61, ye'l cuartu país con más representación, por detrás d'Alemaña, Francia y Italia.

Nos comicios de 2019, el Partido Popular européu ganó les elecciones con 178 escaños. L'alianza progresista de socialistes y demócrates llogró 140 y como tercer fuerza asitióse'l grupu Renew Europa, con 102.

N'España, foi'l Partíu Socialista'l que ganó los últimos comicios europeos con 21 escaños. Siguíu de Partido Popular, con 13, y Ciudadanos con siete. Tamién llograron representación Vox, Podemos, Junts, ERC, Izquierda Xunida, BNG y tres independientes.

Dos asturianos van a los comicios europeos en puestos de salida.

Dos asturianos van a los comicios europeos en puestos de salida. Jonás Fernández, númberu 7 pol Partido Socialista, y Susana Solís, que tres dexar Ciudadanos, va de númberu 15 pol Partido Popular. Los dos afiten la importancia d'estos comicios europeos.

Nun contestu nel que los sondeos apunten a una medría de la ultraderecha europea, dambos afiten la necesidá de defender los valores de la xunión.

Los dos formaron yá parte de l'anterior llexislatura. La defensa de la industria asturiana tuvo, y va siguir tando, sorrayen, nel centru de les sos reinvidicaciones, xunto a otres cuestiones como la economía, l'empléu y l'agricultura.

El Parlamentu Européu fai una llamada a la participación nos próximos comicios

Dende'l Parlamentu Européu tamién se fai una llamada a la participación nos próximos comicios. Punxeron en marcha una campaña na que, al traviés d'un videu, encamienten a votar en masa pa protexer el futuru de la democracia nun momentu delicáu, señalen, dende'l puntu de vista xeopolíticu.

Día d'Europa con actos repartíos per tol Principáu

Y güei 9 de mayu celébrase'l Día d'Europa con actos repartíos per tol Principáu onde los más nuevos son protagonistes como'l futuru garantista d'un europeísmu más sólidu y solidariu.

Un centenar d’escolinos tuvieron n'A Veiga pola redolada de la ría del Eo. Inculcar l'europeísmu pasa por fomentar la conocencia de la Xunión Europea favoreciendo la implicación de la ciudadanía.

Actividaes repitíes per tola xeografía asturiana. En Candamu, los alumnos del Prieto Bances fixeron chapes, reproducieron la bandera, conocieron la historia del euru y los llugares más emblemáticos del vieyu continente.