El gran xuráu imputa a Trump nuna decisión enxamás vista n'Estaos Xuníos

"Nun voi poder tener un xuiciu xustu en Nueva York" denunció na so rede social Trump, que califica l'acusación de falsa y corrupta

La decisión del gran xuráu de Nueva York encargáu del casu nun se vio enxamás. Donald Trump yá ye'l primer ex-presidente de los Estaos Xuníos en ser imputáu pela vía penal. Los cargos entá nun se conocen, pero sí que la causa ta rellacionada col pagu a l'actriz porno Stormy Daniels en cuenta del so silenciu.

En cuanto la Fiscalía de Manhattan concrete los cargos va pidir a Trump que s'entregue. Según espublicen dellos medios esistiría un segundu casu d'otra modelu de Playboy que tamién acusa al ex-presidente de paga-y en cuenta de nun dicir nada de les relaciones sexuales calteníes. Cuestión importante, porque amosaría qu'esiste un patrón de conducta por parte de Trump.

"Nun voi poder tener un xuiciu xustu en Nueva York" denunció na so rede social l'ex-presidente que califica l'acusación de falsa y corrupta. Una amuesa más, sostién, de la caza de bruxes a la que, al so xuiciu, ta siendo sometíu y que nun dulda de que se volverá masivamente a la escontra del presidente Biden.

Declaraciones tres les que la xefatura de la policía de Nueva York ordenó a tolos axentes que se preparen pa una movilización de los cercanos a Trump.

Va haber que ver agora si l'ex-presidente preséntase o non de forma voluntaria ante la xusticia. Pel momentu'l gobernador de Florida, onde Trump tien la so casona, aseguró que nun va atender nenguna solicitú pa estraditalu.