Jonás Fernández trata de contactar con refuxaos con venceyos con Asturies

L'eurodiputáu asturianu señala que les sanciones impuestes son insuficientes

Unos 20 kilómetros dixebren la frontera con Ucraína de la estación de Przemysl​, Polonia, convertida en puntu de llegada de quien fuxe de la guerra. D'equí dalgunos viaxen a otros territorios a axuntase colos sos familiares, otros lleguen ensin nada y son derivaos a centros y cases d'acoyida.

L'eurodiputáu asturianu Jonás Fernández trata estos díes, sobre'l terrén, d'alcontrar a ucraínos con venceyos n'Asturies pa ufierta-yos venir. Son parte del mayor éxodu en territoriu européu dende la segunda guerra mundial.

La resistencia ucraína ye exemplar, sorraya, y foi clave pa facer que la Xunión Europea reaccionara. Pero les sanciones impuestes son, diz, insuficientes. Les que tán por llegar, alvierte, van afectanos.

Como europeos nun podemos aceptar la invasión d'Ucraína, muncho menos los bombardeos a civiles, señala Jonás Fernández​. Hai que remontase, encamienta Fernández, énte un réxime que punxo en peligru l'orde multillateral que conocíemos.