Webcams
Buscar
Los socialdemócrates caltienen la segunda posición nel Parlamentu Européu
La ultraderecha avanza na Xunión Europa. Ye ensin dulda unu de los titulares de les elecciones d'ayeri, pero la suma de los partíos europeístes lideraos pol Partido Popular caltién la mayoría nel Parlamentu européu.
A falta de que s'asoleyen los datos d'Irlanda, l'únicu Estáu col recuentu ensin cerrar, populares, socialdemócrates y lliberales algamaron 402 de los 720 escaños.
El PP sigue como primer fuerza, xube ocho diputaos hasta los 184. Los dos grupos d'estrema derecha, el d'Identidá y Democracia, nel que s'integra l'Agrupación Nacional de Marine Le Pen y el de los Conservadores y Reformistes onde ta, por casu Vox, sumen 131 escaños, 13 más que nos anteriores comicios.
Pero ye una suma incompleta yá qu'habría qu'amestar diputaos ultres de formaciones como la española Se acabó la fiesta o los d'Alianza p'Alemaña que, pel momentu, tán nel grupu de los ensin inscribir.
Tanto La Izquierda como los Verdes pierden representación.
Los socialdemócrates caltienen la segunda posición nel Parlamentu Européu
Nel Parlamentu Européu, los socialdemócrates caltienen la segunda posición perdiendo, a falta de los datos d'Irlanda, dos escaños. Nun mapa claramente tomáu pol azul del PP, la socialdemocracia aumenta, sicasí, el númberu d'estaos onde consiguen caltenese a la cabeza. Va cinco años ficiéronlo n'España, Portugal y Malta.
Nesta ocasión repiten esa primer posición en Portugal y Malta y amiesten Suecia y Rumanía.
