Más de 130 países sofiten inxertar l'agricultura y l'alimentación nos sos planes climáticos

Guterres: Nun ye mui tarde pa llendar el calentamientu pero hai qu'actuar yá

Un total de 134 países, ente ellos España, roblaron la Declaración d’Emiratos Árabes Xuníos sobre agricultura, alimentación y clima llanzada na cume del clima de Dubái y na que se pide a los gobiernos, per primer vegada, inxertar l’alimentación y l’agricultura nos planes climáticos de cada país.

La "Declaración de los EAU COP28 sobre agricultura sostenible, sistemes alimentarios resilientes y acción climática" aborda la necesidá d’amenorgar les emisiones globales y, al empar, protexer les vides y los medios de subsistencia de los agricultores que viven "na primer llinia del cambéu climáticu", informaron dende la presidencia de la COP28.

L’oxetivu, ayudar a construyir un sistema alimentariu mundial "aptu pal futuru" y enfatizar la necesidá d’una acción común sobre’l cambéu climáticu, qu’afecta negativamente a una gran parte de la población mundial, sobre manera a aquellos que viven en países y comunidaes vulnerables.

La so aprobación pon enriba la mesa que si bien los sistemes alimentarios son vitales pa satisfacer les necesidaes de la sociedá y dexar l’adaptación a los impactos climáticos, tamién son responsables d’hasta un terciu de les emisiones mundiales de gas d’efectu ivernaderu.