Munches comunidaes van tener que poner al día los sos ascensores

Los arreglos de los elevadores podríen rondar los 3.000 euros

De cara a setiembre munches comunidaes van tener que poner al día los sos ascensores. Unu de cada tres va tener qu'adaptase a la normativa de seguridá qu'entró a valir el 1 de xunetu. El Colexu d'Alministradores de Finques considera que los arreglos, na gran mayoría de comunidaes de vecinos, van rondar los 3.000 euros.

Un terciu de los ascensores d'Asturies, sobre manera los que superen los 30 años, van tener que ser reformaos. La nueva norma obliga a instalar un intercomunicador, tamién una cortina fotoeléctrica que cubra la entrada torgando que la puerta se zarre si dalgún elementu ocupa la entrada independientemente del altor al que tea; y un pesacargues que bloquiara al elevador si supera'l pesu afitáu.

Amás, va ser necesaria una nivelación que torgue que l'ascensor pare a menos d'un centímetru de la planta en que faiga la parada. Una serie de cambeos que van causar más gastu.

La normativa entró en funcionamientu dende'l 1 de xunetu pero les comunidaes nun van tener la obligación de facer les meyores hasta que lo indique la empresa encargada de la revisión del elevador.

Na revisión, va indicase si tienen d'encarase meyores que supongan una mayor cuantía. Sedría nel casu de tener que cambiar guíes o contrapesos, daqué que va soceder colos ascensores más antiguos.