Biltos verdes tres años dempués de la erupción del Cumbre Vieja en La Palma

Na islla viven 60 asturianos

Va 3 años, el volcán de Cumbre Vieja sepultó cientos de cases na islla canaria de La Palma. Ellí siguen viviendo más de 60 asturianos.

Dalgunos de los que sufrieron les consecuencies de la erupción, perdieron les sos cases y tuvieron viviendo en módulos prefabricaos hasta va namás unos díes, esplica José Alfredo Blanco, presidente del Centro Asturianu de La Palma.

Reconocen que la burocracia foi, en dalgunos casos, escesiva y que, en situaciones d’emerxencia como la que se vivió na islla, hai qu’axilizar la rempuesta.

Enantes de que la llava y la povisa sepultaren los cultivos, el Valle de Aridane yera la meyor zona productiva de plátanos de Les Canaries. Enagora, l’actividá ta entamando a recuperase.

Hasta 2021, aproximadamente’l 40% de la superficie cultivada en La Palma dedicábase al plátanu. Los asturianos residentes na islla esperen que dientro d’añu y mediu, cuando se cumplan cuasi cinco de la erupción, el plátanu puea volver a pañase na islla.