Les universidaes esperen que l'alumnáu conoza la nueva selectividá enantes de Navidá

La prueba tendrá un únicu modelu d'exerciciu pa cada materia y cobrará pesu'l nivel de competencies  

Les universidaes confíen en que l’alumnáu de segundu de Bachilleratu conoza enantes de Navidá los nuevos modelos d’examen de la Prueba d’Accesu a la Universidá (PAU), que contemplará un únicu modelu d’exerciciu pa cada materia y onde cobrará pesu’l nivel de competencies.

La Conferencia de Rectores de les Universidaes Españoles (CRUE) aconceyará previsiblemente la próxima selmana p’afitar la propuesta que foi consensuada estos últimos díes en Bilbao polos vicerrectores de les universidaes en collaboración colos coordinadores d’esta prueba de les comunidaes autónomes.

Fontes universitaries que participaron nestes xuntes, qu’acabaron esti vienres, señalen a EFE que la "idea ye que se sepan bien llueu los modelos d’examen y puean asoleyase enantes de Navidá".