El 1 de payares entren en vigor les nueves bonificaciones nel peaxe d'El Güerna

El Conseyu de Ministros aprueba los descuentos anunciaos por Tresportes a entamos de 2024

Dende’l 1 de payares viniente entren en vigor les nueves bonificaciones nel peaxe de l’Autopista d’El Güerna con descuentos pa vehículos llixeros dende’l primer percorríu completu, ye dicir, ente Asturies y Lleón o viceversa.

El Conseyu de Ministros aprobó güei que nel primer viaxe la rebaxa seya del 15%, 2,25 euros. Nel segundu viaxe, del 30%, lo qu’equival a 4,5 euros y dende’l tercer viaxe’l descuentu sedrá del 60%, como hasta agora.

Estes bonificaciones namás son aplicables si se faen como poco tres percorríos completos al mes y si se tien telepeaxe pa pagar, un aparatu que se lleva nel coche y que cuesta unos 15 euros al añu.

Los precios pa los vehículos pesaos queden enagora como tán, con bonificaciones del 40%. Anque’l Ministeriu de Tresportes dixo güei que ta trabayando pa medrar esa rebaxa al 60%.