La Inspección de Trabayu recalda 15 millones d'euros controlando les hores estra dende 2015

Les actuaciones llevaes alantre pola Inspección provocaron que los trabayadores ficieren 48,8 millones d'hores estra menos

La vicepresidenta segunda y ministra de Trabayu, Yolanda Díaz, señaló que la Inspección de Trabayu medró un 54% les sos actuaciones pa controlar les hores estra non pagaes dende 2015, lo que supunxo una recaldación de más de 15 millones d’euros por incumplimientos empresariales.

En rempuesta a una entruga del diputáu de Bildu Oskar Matute nel plenu del Congresu de los Diputaos, Díaz señaló qu’en 2015, con 15 millones d’asalariaos, facíense 3,5 millones d’hores estra impagaes a la selmana.

"Agora, con 18 millones d’asalariaos, amenorgamos nun millón esa cifra, y fáense 2,5 millones d’hores estra non remuneraes a la selmana", amestó.