Los valencianos salen a la cai pa pidir la dimisión del presidente de la Generalitat

Dos meses de la catástrofe na que perdieron la vida 226 persones

Los valencianos van salir a la cai esta tarde a pidir la dimisión del presidente de la Generalitat Valenciana, Carlos Mazón, pola so xestión de la dana. Ye la tercer convocatoria d'unes protestes que güei coinciden colos dos meses d'esta catástrofe na que perdieron la vida 226 persones.

Aquel 29 d'ochobre, la escorrentía de los 445 llitros per metru cuadráu de la sierra de Las Cabrillas, convirtióse en fola, y ésta nun tsunami de folla que llevó cuanto atopó al so pasu camín de L'Albufera.

La Generalitat taba en Prealerta polos avisos de l’Aemet, pero estes alvertencies nun llegaron a la población hasta que l'agua anubría les sos cases. Un total de 226 persones perdieron la vida, trés inda tán en busca.

Cuando pasó lo peor, la incredulidá apoderóse de les 845.000 persones que viven en L'Horta Sud énte la devastación, ensin agua, ensin lluz, ensin cases, ensin colexos, ensin cais.... Y de rabia, énte la inacción de les autoridaes, que se fixo patente cuando los reis fueron per primer vegada a la zona cero, a Paiporta.

Un total de 61 díes dempués, la indignación con toles alministraciones sigue na cai con manifestacion escontra'l presidente de la Generalitat, ausente, de comida n'El Ventorro, nes hores de la traxedia. Envede dimitir, remodela’l Consell.

La mesma dana dexó otra riada, la de los miles de voluntarios qu'a pie y en bicicleta arremangáronse pa sacar folla de les cases y cocheres; y la de les fuerces de seguridá, Protección Civil y la UME, cuando llegaron díes dempués.

Agora les escombreres con 400.000 tonelaes d’enseres, y los cementerios nos que s’axunten 128.000 vehículos estrozaos, acolúmbrense dende l'autovía Pista de Silla.