Los xuristes ven inoportunidá na llende de les acusaciones populares

Feijóo acusa a Sánchez d'asonsañar a Maduro y cambiar la llei pa que nun xulguen a la so familia

El PSOE rexistró nel Congresu una proposición de llei que prohíbe exercer l'acusación popular a partíos políticos y asociaciones o fundaciones venceyaes a ellos. Los socialistes impulsen esta midida, según dicen, pa frenar l'acosu deriváu d'acciones xudiciales abusives.

El testu aborda cuatro aspeutos: la reforma de l'acusación popular, la obligación de nun almitir querelles ensin nicios previos, la supresión del delitu d'ofenses escontra los sentimientos relixosos y la posibilidá d'estremar de los casos a los xueces que faen declaraciones polítiques.

Los socialistes quieren torgar que nin los partíos políticos nin les sos asociaciones allegaes puean presentar querelles como acusación popular. Una figura xurídica que dexa a cualquier ciudadanu entamar un procesu xudicial anque esti nun seya víctima directa del delitu, esplica Javier Fernández Teruelo, decanu de la Facultá de Derechu de la Universidá d'Uviéu.

Teruelo ve con bonos güeyos que s'establezan llendes. Considera, sicasí, que la reforma plantégase en mal momentu. Sobre la mesa hai casos por exemplu, como los qu'afecten a Begoña Gómez o David Sánchez, muyer y hermanu de Pedro Sánchez. Estes investigaciones podríen vese paralizaes, porque la reforma plantégase con calter retroactivu.

Precisamente por ello, la midida ta xenerando gran discutiniu. Pese a ello, Javier Fernández Teruelo recuerda la importancia de protexer la figura de l'acusación popular.

Nun ye la primer vegada que s'intenta una reforma asemeyada. Los socialistes y los populares yá punxeron sobre la mesa midíes paecíes en 2011 y 2017, que finalmente cayeron en sacu rotu.

Feijóo acusa a Sánchez d'asonsañar a Maduro y cambiar la llei pa que nun xulguen a la so familia

El líder del PP, Alberto Núñez Feijóo, acusó al presidente del Gobiernu, Pedro Sánchez, de "asonsañar" al líder chavista venezolanu Nicolás Maduro, al que calificó de "dictador", y cambiar la llei pa que nun xulguen a la so familia.

Feijóo fixo esta afirmación nun actu públicu esti domingu n'Uviéu, nel qu'esbilló los alcuerdos de vivienda algamaos nun retiru, a puerta zarrada, colos presidentes autonómicos de la so formación y que quedaron formalizaos na Declaración d'Asturies.

El líder de la oposición argumentó que la proposición de llei presentada pol PSOE nel Congresu pa, entre otres coses, torgar que los partíos exerzan l'acusación popular, son en realidá "indultos preventivos pa que la familia del presidente nun puea ser xulgada nel nuesu país".

El PSOE afirma que nun proponen desaniciar l'acusación popular sinón acutala

La secretaria de Política Económica y Tresformamientu Dixital del PSOE, Enma López, afirmó que los socialistes nun planteguen desaniciar l'acusación popular na proposición de llei de reforma de la Xusticia que plantegaron nel Congresu sinón que l'oxetivu ye "llendala" o acutala".

"La proposición de llei propón acutar, nun desaniciar esa acusación popular. Nun paez lóxico que seyan partíos políticos o asociaciones allegaes a los partíos políticos quien usen esa figura. Y nun se ta suprimiendo en nengún casu", señaló a los medios de comunicación na visita a una promoción de vivienda protexida de la Comunidá de Madrid en Alcorcón.

La responsable socialista encamentó a los partíos políticos a que presenten enmiendes y aportaciones a la proposición de llei presentada apocayá yá que la norma va siguir la so tramitación nel Congresu y nel Senáu, onde tien de ser aprobada por mayoría.