El Gobiernu nun piensa nun decretu darréu pa salvar los efectos del refugu nel Congresu

Feijóo acusa al Gobiernu d'usar a los pensionistes como "escudos humanos"

El Gobiernu nun tien intención d’aprobar darréu un decretu que salve los efectos del refugu nel Congresu, qu’inxertaba la xubida de les pensiones y l’anovación de les ayudes al tresporte, y carga la culpa nel PP, mientres socios del Executivu como Sumar y ERC apuren a tomar yá midíes.

Un día dempués de que’l plenu del Congresu refugare’l real decretu llei 'ómnibus', col votu a la escontra de PP, Vox y Junts, sigue la batalla pol rellatu y el cruce d’acusaciones polítiques, qu’esti xueves protagonizaron el presidente del Gobiernu, Pedro Sánchez, y el líder del PP, Alberto Núñez Feijóo.

Dende Valencia, onde s’aconceyó colos alcaldes de los conceyos más afectaos pola dana, Sánchez pidió a tolos grupos parllamentarios a reconsiderar la so posición, pero afondó nel PP.

"Creo que’l Gobiernu fizo’l so trabayu; presentó un decretu llei que trabayó con tolos grupos, qu’acordó cola mayoría parllamentaria nel Congresu y lo que-y pidiría a los grupos que votaron a la escontra, particularmente al PP, ye que reconsidere esta oposición destructiva que causa dolor social", dixo

Na mesma llinia, la vicepresidenta primera y ministra de Facienda, María Jesús Montero, aseguró que’l refugu del decretu convierte a los ciudadanos "en rehenes" d’una "oposición destructiva", pero aseguró que’l Gobiernu siguirá falando col propósito de garantizar el bienestar de la mayoría social.

Y el voceru del PSOE nel Congresu, Patxi López, foi más p’allá al culpar al PP, pero tamién de forma esplícita a Vox y a Junts, por votar "a la escontra de la xente".

Per parte de so, Feijóo acusó al Gobiernu d’usar a los pensionistes como "rehenes" y "escudos humanos" y d’intentar "engañar" al responsabilizar al PP de la cayida del decretu 'ómnibus'.