El Congresu aprueba desprotexer al llobu colos votos de PP, Vox, Junts y PNV

Barbón: Asturies tuvo y ta radicalmente a favor de desprotexer al llobu

El plenu del Congresu aprobó esti xueves desprotexer al llobu al traviés d'una enmienda del PP al proyectu de llei de prevención de les perdes y l’esperdiciu alimentariu, que salió alantre col sofitu de Vox, Junts y PNV.

Ye una polémica enmienda, que foi incorporada al testu d'esa norma aprobada güei nel trámite previu nel Senáu pa sacar al llobu del Llistáu d'Especies Monteses en Réxime de Protección Especial (Lespre), nel casu de les poblaciones de la zona norte del Dueru.

Nel alderique güei nel plenu del Congresu, la diputada del PP Milagros Marcos aseguró que nun van llograr "acallar al mundu rural" los qu'intenten faelo, porque'l Partido Popular va tar del llau de llabradores y ganaderos, cola defensa de "una xestión responsable" del llobu.