Mónica García refuga amenorgar el MIR de Medicina de Familia a tres años

El Colexu de Médicos recuerda que son ellos quien atienden toles patoloxíes

La ministra de Sanidá, Mónica García, refugó esti martes amenorgar el periodu MIR de Familia de cuatro a tres años, como plantegó Euskadi col fin de faer frente al déficit de facultativos n'Atención Primaria, porque eso diría en "desterciu" de la calidá de la formación d'estos profesionales.

El Sindicatu Médicu Profesional d'Asturies señala que ye mentira qu'esos estudios duren n'otros países tres años y el Colexu de Médicos recuerda que son ellos quien atienden a tola población y de toles patoloxíes.

Hai que medrar el númberu de médicos de familia, pero non en desterciu de la calidá de los sos estudios, asegura la ministra de Sanidá, Mónica García.

Na mesma llinia ta'l Simpa. José Antonio Vidal, secretariu xeneral del Simpa, asegura que pa qu'haya más médicos de familia, les soluciones tienen de ser estructurales y non, apuntó, "ocurrencies polítiques".

Amás, puntualizó que nun ye verdá que n'otros países europeos los estudios pa médicos de familia duren menos. Esplicó que, pese a la especialización ye más curtia, la formación pregrau dura más.

Pela so parte Alba Méndez Gallego, vocal d'Atención Primaria del Colexu de Médicos d'Asturies, asegura que, anque la situación actual ye complicada, la solución nun ye amenorgar la formación.