Albares da anuncia de la evacuación de la embaxadora d'Ucraína y d'un centenar d'españoles

Calviño: "España ta menos espuesta a la economía rusa"

El ministru d’Asuntos Esteriores, José Manuel Albares, dio anuncia esti vienres de la evacuación d’Ucraína de la embaxadora española Silvia Cortés nun convói nel que tamién van un centenar d’españoles, mientres que otros cien "mui enraigonaos" nel país decidieron quedar por voluntá propia.

En dos entrevistes n’Antena 3 y COPE, Albares esplicó qu’esti convói amiéstase al que salió esti xueves con otros 50 españoles poro, queden nel país unos cien compatriotes a los que se-yos ufiertó salir pero como los más tienen doble nacionalidá y tán mui afitaos n’Ucraína, prefirieron quedar.

El ministru solliñó que les sanciones a Rusia tomarán cuerpu esti vienres y amosóse convencíu de que dempués de la xunta de xefes d’Estáu y de Gobiernu de la OTAN tomaránse toles midíes afayadicenes "pa reforzar el flancu oeste y la seguridá de la OTAN".

La vicepresidenta primera d’España y ministra d’Economía, Nadia Calviño, afirmó esti vienres que "España tien una menor esposición" a la economía rusa qu’otros miembros de la Xunión Europea.

"Les nuestres relaciones tán mui centraes nel ámbitu de los hidrocarburos, pero tenemos una menor dependencia qu’otros países", señaló Calviño a la so llegada a una xunta informal de ministros d’Economía y Finances de la XE que discutirá les consecuencies económiques pa Europa de la invasión rusa d'Ucraína.