Cascos: "Enxamás recibí nenguna llamada en rellación con axudicaciones"

Declara a pidimientu de Bárcenas en rellación a les sigles PAC

L'ex-secretariu xeneral del PP Francisco Álvarez-Cascos negó güei nel xuiciu del casu Gürtel intermediar como ministru de Fomentu n'axudicaciones a cambiu de comisiones y aseguró que les sigles "PAC" de la contabilidá B de la trama nun se refieren a él.

Na xornada de güei de la vista, Cascos foi preguntáu por una grabación telefónica interceptada pola Policía na que'l presuntu cabezaleru de la trama, Francisco Correa, comentaría que llevara al tamién acusáu Luis Bárcenas, ex-tesoreru del PP, mil millones de pesetes por axudicaciones d'obres na dómina na qu'aquel foi ministru de Fomentu.

Ye una conversación qu'interceptó la Policía ente Correa y el tamién acusáu José Luis Peñas, ex-conceyal del PP de Majadahonda (Madrid), que destapó esti casu.

"Ye inverosímil esa versión porque nel Ministeriu de Fomentu ye imposible un tratu de favor", aseguró Francisco Álvarez-Cascos, que comentó que desconoz por qué Correa dixo daqué qu'afectó tanto al so honor y conseñó: "Supongo qu'en dalgún momentu'l tiempu va poner les coses nel so llugar y dalgún va reconocer lo que tenga que reconocer".

Francisco Álvarez-Cascos afirmó que nun recibió dineru n'efectivo del partíu al marxe del so sueldu y que namás ingresó cobros al traviés de "procedimientos ordinarios" como tresferencies o cheques.

Díxolo a entrugues de la fiscal Concepción Sabadell, que-y entrugó sobro aspeutos rellacionaos cola pieza separtada de Gürtel que trata sobre la supuesta contabilidá B del PP, énte la protesta del abogáu de Luis Bárcenas, quien pidió la so declaración como testigu nesti xuiciu.

"¿En dalgún momentu recibió dineru n'efectivo al marxe del so sueldu?", preguntó-y la fiscal, que respondió categóricu que "non" y remitió a la so declaración énte'l xuez nel marcu de la pieza separtada, conocida como'l casu Bárcenas.

Respecto al informe de la UDEF de la Policía Nacional de 2014 que-y atribúi les sigles "PAC" como perceptor de dineru de la trama nes campañes electorales de 2003 y 2004, aclarió que l'inspector que lu robló depués emitió otru nel que nun facía referencia a él y indicó, en tou casu, que nun participó en nenguna d'eses campañes.

"Supongo que nun va haber nenguna dulda de que siguir faciendo estes insinuaciones carez dafechu de sentíu", dixo al respecto.

Cascos tamién afirmó que dempués de lo asocedío nel añu 1990 col conocíu como "escándalu Naseiro", nel PP "nun había muncha afición a los donativos y a les aportaciones", y anque reconoció que formalmente él se tenía qu'ocupar d'esi asuntu, dixo que se "llendaba" a "refrendar" cola so firma les "actividaes ordinaries de la Tesorería".

En tou casu, él nun recuerda recibir en persona nengún donativu pal PP nin-y consta que Correa los realizó y aseguró que Bárcenas nun-y pidió nengún favor de naturaleza personal y que nun tien motivu de reproche con él cuando coincidieron nel partíu.

A entrugues del abogáu de Bárcenas aseguró que nel so periodu de ministru de Fomentu (2000-2004) "enxamás" recibió "nenguna llamada o indicación" pa favorecer a determinaes empreses, y tien la "certidume" de que los altos cargos que dependíen d'él tampoco.

Cascos, que dixo que conoció a Correa al traviés de la so axencia de viaxes que trabayaba pal PP y qu'él tamién usó pa los sos viaxes particulares, manifestó que'l Ministeriu de Fomentu "nun intervenía nos procesos de contratación" y por tanto la so influencia nellos yera "materialmente imposible".

Esplicó que cuando llegó a esi Ministeriu camudó les normes de contratación pa "garantizar la tresparencia y la oxetividá de les resultancies de los concursos", lo que fixo que naquellos años "la oxetividá y la tresparencia" tuvieren "aseguraos". "Nel Ministeriu de Fomentu na mio dómina yeren imposibles los tratos de favor", conseñó.

Esti cambéu dio llugar a nuevos pliegos de condiciones polos que se modificó'l sistema "d'apertura de sobres" de manera que los sobres coles propuestes llegaben cerraos a los técnicos y miembros de la mesa de contratación, lo que facía imposible "cualquier criteriu de discrecionalidá".

Sobre Bárcenas, dixo que trató con él na so etapa de secretariu xeneral del PP (1989-1999) y que nun recuerda que nunca-y pidiera favor dalgunu pa favorecer a empreses: "Nun tengo nengún motivu de reproche a la conducta del señor Bárcenas como xerente del partíu", amestó.