Deteníu Ignacio González por supuesta xestión irregular de la Canal d'Isabel II

El PP suspende provisionalmente de militancia a González

L'ex-presidente de la Comunidá de Madrid Ignacio González ye unu de los 12 deteníos güei na operación de la Guardia Civil por supuesta corrupción na Canal d'Isabel II. Ante esto, el PP decidió suspender provisionalmente de militancia a Ignacio González.

El partíu tenía abiertu dende marzu de 2016 un espediente a González pola investigación abierta nun xulgáu d'Estepona (Málaga) pola compra del so áticu nesti llugar, pero dende entós el PP nun tomara nenguna decisión sobre l'ex-presidente madrilanu.

Na operación, que tán llevando alantre axentes de la Unidá Central Operativa (UCO) de la Guardia Civil y que dirixe'l xuez de l'Audiencia Nacional Eloy Velasco, espérense delles detenciones d'antiguos directivos de la empresa pública madrilana.

Ente los arrestaos ta tamién Edmundo Rodríguez, consideráu home fuerte de González en Llatinoamérica, mientres que la muyer del ex-presidente madrilanu, Lourdes Cavero, ta siendo investigada.

Amás, tán practicándose dellos rexistros na capital, ente ellos na sede de la Canal d'Isabel II, organismu que presidió González ente 2003 y 2012, años ente los que foi vicepresidente del Executivu madrilanu.

Ente los delitos que s'investiguen destaca la compra fraudulenta de la empresa brasileña Emissao Engenharia y Construçoes que foi denunciada'l mes pasáu ante la Fiscalía por PSOE, Podemos y Ciudadanos na Comunidá de Madrid.

Los tres partíos presentaron un informe que recoyía presuntes irregularidaes na compra por parte de Canal Isabel II d'esta empresa con un "quebrantu" que Podemos cifra en 35 millones.

Según l'informe, la empresa Emissao mercóse por 21,4 millones d'euros y un mes dempués el so patrimoniu netu yera de 10,629 millones según les cuentes de la Canal; un añu dempués, el valir yera de 5,380 millones.

Estes presuntes irregularidaes nun se llendaríen a la compra d'Emissao, constata la denuncia que fai usu del trabayu de la comisión d'estudiu del endeldamientu de l'Asamblea de Madrid, na que tán representaos tolos partíos.