El 70% de los sanitarios tien dalgún síntoma afectivu deriváu de la situación de pandemia

Espertos piden considerar a les persones con enfermedá mental grave como prioritaries na vacunación​

Un estudiu ente sanitarios nel Hospital Xeneral Universitariu Gregorio Marañón afita qu’hasta’l 70% del personal tien dalgún síntoma afectivu deriváu de la situación de pandemia.

Los síntomes más avezaos que se tán detectando pola crisis sanitaria son trestornos d’ansiedá, depresión, afectivos o del sueñu, según señaló’l presidente de la Sociedá Española de Psiquiatría, Celso Arango.

Nuna entrevista a TPA Noticies Matinal, Celso Arango esplicó que s’espera una medría, según la OMS, d’hasta un 20% en depresión y ansiedá por mor de la cantidá de persones infestaes y l’altu númberu de muertos, y a la incertidume. El confinamientu nun afecta por igual a tola población, hai grupos más vulnerables como los sanitarios.

La Sociedá Española de Psiquiatría insiste en considerar a les persones con enfermedá mental grave como prioritaries na vacunación.

Recuerden qu’estes persones tienen el doble de posibilidaes de contaxase y el doble de posibilidaes de tener peor pronósticu una vegada contaxaos.