El Congresu autoriza a Sánchez a ampliar el "indispensable" estáu d'alarma

Los soberanistes piden un confinamientu más esixente y parar la producción de tolos sectores non esenciales

El Congresu los Diputaos autorizó, entrada la madrugada de güei xueves, la prórroga del estáu d'alarma que defendió'l presidente del Gobiernu, Pedro Sánchez, como una dura midida pa la sociedá, pero "indispensable" frente al coronavirus, polo que pidió unidá y llealtá polítiques.

El respaldu del Congresu foi grande al traviés del escepcional recursu al votu telemáticu, yá qu'al hemiciclu, pa evitar contaxos, solo fueron poco más de 40 diputaos y daqué menos d'una decena de ministros, lideraos por Sánchez.

Nun hebo nin un votu de refugu y solo s'abstuvieron les formaciones independentistes y soberanistes d'ERC, JxCat, EH Bildu, la CUP y el BNG.

Fueron computaos 321 votos a favor, 28 abstenciones y nengún votu escontra.

Pa los partíos soberanistes, les crítiques son les mesmes: el confinamientu de los ciudadanos como gran midida de contención de contaxos por COVID-19 tien que ser más esixente, y amás, hai que parar la producción en tolos sectores menos los que seyan esenciales na actual coxuntura.

El sofitu vino de sigles d'izquierda, como Xuníes Podemos o Más País, pero tamién de les de la derecha, casos del PP, Vox y Cs. Sicasí, ello nun evitó reproches y alvertencies.

Sacantes la formación de Pablo Iglesias y el PSOE, tolos grupos presentes nun Congresu nuevamente mediovacíu poles obligatories midíes de seguridá afitaes pola mesma Cámara cuestionaron aspeutos de la xestión de Sánchez.

Y el presidente, a pesar de too, afondó na relevancia de qu'énte la siguiente fase que se va abrir cola prórroga del estáu d'alarma la unidá y la llealtá seyan les prioridaes.

Destacó qu'esa prórroga ye la "única opción eficaz" pa frenar l'espardimientu del coronavirus, qu'esti miércoles algamó datos bien malos: más de 47.600 contaxos y más de 3.400 fallecimientos, lo qu'asitia a España con un númberu de muertes más altu que China hasta la fecha.

La inmensa mayoría de ciudadanos, por tanto, van tar confinaos nes sos cases, pel momentu, dende'l 14 de marzu al 11 d'abril, cuasi un mes. Ye "indispensable" la midida, afirmó Sánchez.

Cola ampliación del estáu d'alarma, que va ser nes mesmes condiciones que'l vixente, el país intenta ganar tiempu y facilitar que'l sistema nacional de salú aguante a pesar de la saturación y tensión a les que ta sometíu.

Acordies con Pedro Sánchez, el tiempu, si s'algama, va convertirse nun factor clave pa, primero, apandar la curva de contaxos y depués baxala. Y hai, al so xuiciu, "otru bien igual de bonu" nesti momentu: la unidá y la llealtá.

Frutu de la llealtá, el presidente avanzó una nueva iniciativa que quier trazar una canal d'información y coordinación ente'l Gobiernu y el Congresu.

La Comisión de Sanidá va convertise mientres dure la pandemia nuna suerte de comisión de siguimientu de la so evolución y el ministru del ramu, Salvador Illa, va comparecer énte ella una vegada a la selmana. Va recibir, amás, los datos del Comité Técnicu y los qu'a diario remana'l Centru de Coordinación d'Alertes y Emerxencies Sanitaries.

En reciprocidá, el Gobiernu va atender les propuestes que-y tresmitan los grupos.

Sánchez dexó claro, en referencia a les reclamaciones de munchos partíos pa endurecer el confinamientu, que lo que busca'l Gobiernu ye l'equilibriu ente les severes midíes actuales de contención y la posibilidá de que, terminaes estes, el país retome rápido'l dinamismu económicu.

El líder del PP, Pablo Casado, sorrayó'l so respaldu a la prórroga, pero tamién el cuestionamientu de la xestión del Executivu, que cree encaró tarde la crisis del virus -alusión a la selmana del 8M-, y por esti motivu, acusólu de "neglixencia grave".

Tampoco cree qu'haya midíes efectives, más bien "soflames", y asina, pidió qu'abandone los "mítines".

Casado propunxo que cuando pare la pandemia celebre un funeral d'Estáu y se faiga un monumentu na alcordanza de les víctimes nel centru de Madrid.

Vox tamién va sofitar la prórroga, como avanzó'l so presidente, Santiago Abascal, lo que nun quitó que lo fixera ente crítiques a la xestión de la emerxencia y ente pidimientos de ceses. Asina esixó a Sánchez que cese al so vicepresidente segundu, Pablo Iglesias, y al director del Centru de Coordinación d'Emerxencies Sanitaries, Fernando Simón, a quien acusa de demora na prevención.

Cs tuvo presente nel hemiciclu a pesar de les protestes que lleva repitiendo tola selmana pa que'l plenu seya telemáticu y s'eviten asina riesgos de contaxos. La líder de la formación, Inés Arrimadas, nun asistió pol so embaranzu.

Nel so llugar, la diputada María Muñoz, coles manes protexíes por guantes, ratificó'l votu a favor de Ciudadanos, pero con condiciones, siendo la más importante la entrega de material sanitario a los profesionales.

Básicamente dos fueron les exes de les desavenencies col Gobiernu: que'l confinamientu tien que ser más duru, pola qu'apostaron les formaciones independentistes y la mayoría de los partíos minoritarios, y una actuación inicial tardía.

La espansión del coronavirus ye agora la que ye por esa xestión inicial de la crisis, argumentaron sobre manera PP y Vox.

El presidente negó que seya asina, anque almitió que, efectivamente, nun se pudo frenar -tampoco n'otros países-, y señaló que frente a les promeses de la oposición d'investigar la xestión y esixir responsabilidaes, él defenderáse, pero non agora. Volvió apelar a la unidá porque "l'enemigu" ye común: el virus.

Igualmente reclamó la solidaridá de tol país con Madrid.