El Gobiernu destaca'l sofitu de los presidentes a Sánchez frente al COVID-19

Torra pide a Sánchez confinamientu domiciliariu y qu'aislle Cataluña y Madrid

Tolos presidentes autonómicos y los de les ciudaes de Ceuta y Melilla sumáronse esti domingu al llamamientu d'unidá d'acción pa ganar la batalla al coronavirus, según informó'l Gobiernu tres la videoconferencia caltenida col xefe del Executivu, Pedro Sánchez.

Cuatro hores duró la xunta telemática, qu'entamó sobre les 10:30 hores, y na que Sánchez treslladó "con detalle" a los gobernantes autonómicos les acciones que'l Conseyu de Ministros decretó, pero tamién escuchó les sos suxerencies sobre les midíes que se van dir aplicando.

Según el Gobiernu, los máximos responsables de les autonomíes fixeron saber al presidente Sánchez que van actuar nos sos territorios con responsabilidá y llealtá na aplicación del real decretu d'estáu d'alarma, qu'entró en valir la pasada medianueche.

Na videoconferencia, Sánchez recordó a los presidentes autonómicos que "esta llucha nun tien colores políticos" y comprometióse a estudiar les sos propuestes dientro de la coordinación necesaria p'aplicar l'estáu d'alarma.

Pero "siempres - dixo- buscando l'interés xeneral y la preservación de la salú pública, como bienes principales nesti momentu".

Mientres, fontes de la Generalitat amosaron delles discrepancies col Gobiernu de Pedro Sánchez.

Según estes fontes el presidente Quim Torra reclamó al Gobiernu qu'alcuerde'l "confinamientu domiciliariu total" de les zones que lo soliciten, y l'aisllamientu de Cataluña y Madrid y el zarru de fronteres, aeropuertos y cais.