El PP celebra la primer vuelta del so inéditu procesu pa escoyer líder

Mercedes Fernández destaca que'l procesu n'Asturies ta siendo "impecable"

La presidenta del PP d'Asturies, Mercedes Fernández, aseguró güei que la primer vuelta del procesu abiertu nel partíu pa escoyer al socesor de Mariano Rajoy llevóse alantre con "llimpieza, llibertá y de manera impecable".

"Trabayamos en democracia porque creemos na democracia y por eso el procesu n'Asturies foi impecable y espero qu'amás seya participativu", señaló tres votar na urna puesta na sede local d'Uviéu xunto al secretariu xeneral del PP asturianu, Luis Venta, y minutos enantes de que lo ficiere la diputada nacional Susana López Ares.

N'Asturies apuntáronse 2.189 militantes pa participar nesta primer vuelta pa la que s'habilitaron 22 meses electorales n'otros tantos conceyos del Principáu.

La presidenta de los populares asturianos, que reconoció que'l votu ta "mui discutíu, reñíu y fragmentáu" recordó que per Asturies pasaron tres de los seis precandidatos y que, como se comprometiera, tuvo con toos ellos en Xixón y Uviéu.

La ex-vicepresidenta Soraya Saénz de Santamaría; la secretaria xeneral del partíu, Dolores de Cospedal; y el vicesecretariu de Comunicación, Pablo Casado, fueron los precandidatos que nos últimos díes visitaron Asturies pa xuntase con militantes del partiíu.

De los 54 compromisarios electos qu'Asturies apurrirá al Congresu Estraordinariu que tendrá llugar en Madrid el 20 y 21 de xunetu güei sólo se van escoyer nuna segunda urna los d'Uviéu, Avilés, Grau y Castrillón yá que nel restu presentáronse igual númberu d'aspirantes que de compromisarios a escoyer, colo que nun foi necesario facer la votación.

Primer vuelta

De los cuasi 870.000 afiliaos del PP, apuntáronse poco más de 66.000 pa participar nestes primeres primaries ensin un socesor a deu.

Mariano Rajoy llevó la so neutralidá hasta'l final y nun votó. Sí votaron yá los seis aspirantes a liderar el PP.

El más madrugador Elio Cabanes, que dende Valencia pidía que l'escoyíu sume pa que'l partíu salga reforzáu.

Esa idea d'una candidatura unitaria sobrevoló Madrid. Nel barriu de Salamanca, los precandidatos Pablo Casado y Soraya Saenz de Santamaría, votaron na mesma sede del barriu con media hora de diferencia.

María Dolores de Cospedal votó n'Albacete, mientres que José Ramón García fízolo n'Ávila, y José Manuel García Margallo en Jávea.

De los seis quedarán dos depués d'esta primer vuelta, onde seis comunidaes son clave. Andalucía, Valencia, Castiella y Lleón, Galicia, Madrid y Castiella La Mancha que concentren el 70% de los inscritos.

Sicasí, la última palabra tendránla en 15 díes los 3.184 compromisarios si nun hai una única llista.