El PSOE gana les elecciones y el PP llogra’l peor resultáu de la so hestoria

PSOE 123; PP 66; Ciudadanos 57; Xuníes Podemos 42 y Vox 24

El PSOE ganó les elecciones xenerales con 123 diputaos y va poder formar mayoría pa gobernar coles formaciones d'izquierda y los nacionalistes, yá que’l fundimientu del PP, que col peor resultáu de la so hestoria pierde 71 diputaos y cai a 66 escaños, incapacítalu pa conformar una alternativa.

Ente tanto, Ciudadanos xube de 32 a 57 escaños y asítiase como tercer fuerza política quitando’l puestu a Xuníes Podemos y averándose al PP, del que solo lu separten unos 200.000 votos, mientres que Vox entra nel Congresu con 24 escaños y más del 10 por cientu de los sufraxos.

Perdió sofitu la formación de Pablo Iglesias, que xunto a la so confluencia catalana suma 42 diputaos, que podríen vali-y a Pedro Sánchez pa tratar de conformar una mayoría pa gobernar.

Eso sí, el PSOE necesitaría tamién de los seis escaños del PNV, lo mesmo que d’otros minoritarios, y taría suxetu al votu d'ERC na investidura, que colos sos 15 diputaos pue tener la llave pa la escoyeta del presidente, si sofita o inclusive si s’abstién nuna segunda vuelta.

Los resultaos de los comicios abren tamién una puerta teórica a otru posible pactu ente'l PSOE y Ciudadanos, yá que xuntos axunten 179 escaños, tres perriba de la mayoría absoluta del hemiciclu.

Cualesquier otra combinación del partíu vencedor pasa necesariamente por Xuníes Podemos, col qu'axunta 165 escaños y a partir d'ende ábrense delles opciones.