El PSOE rexistra nel Congresu la moción de censura escontra Rajoy

Rajoy: "La moción ye pa que Sánchez seya presidente a cualquier preciu"

El grupu socialista rexistró nel Congresu la moción de censura del PSOE escontra’l presidente del Gobiernu, Mariano Rajoy, malapenes 24 hores de conocese la sentencia del casu Gürtel, informaron fontes socialistes.

El rexistru de la moción, que llevó en mano la portavoz del PSOE, Margarita Robles, foi enantes de que’l secretariu xeneral del partíu, Pedro Sánchez, informe a la Executiva Federal del partíu, qu’a esta hora ta aconceyada na sede de Ferraz.

El líder del PSOE, Pedro Sánchez, esplicó que la moción de censura que propón ye pa "constituyir un Gobiernu del PSOE", col oxetivu de convocar elecciones "cuanto enantes".

"La moción ye constructiva, pa garantizar la gobernabilidá, constituyir y formar un gobiernu del PSOE, con fundamentos sólidos y una fueya de ruta clara", dixo Sánchez na so comparecencia énte los medios.

Según señaló, sedrá un gobiernu "pa una axenda social, que cumplirá y fadrá cumplir la Constitución Española y que garantizará la convivencia y el cumplimientu del nuestru ordenamientu constitucional".

El presidente del Gobiernu, Mariano Rajoy, recriminó que l’únicu oxetivu de la moción de censura presentada güei pol PSOE ye que’l so líder, Pedro Sánchez, seya presidente del Gobiernu "a cualquier preciu y col que seya, lo demás da igual".

Nuna rueda de prensa dempués del Conseyu de Ministros, dempués de que’l PSOE presentare la moción, Rajoy consideró que Sánchez "nun tien autoridá moral" pa presentar esta moción que responde al "únicu interés" del líder socialista que "ta buscando’l so sitiu na política española".

Rajoy señaló qu’una de les opciones ye que la moción cuente col sofitu de Ciudadanos y Podemos, o de los independentistes, ERC y PDeCAT, lo que supón el sofitu del ex-president Carles Puigdemont y el d’anguaño Quim Torra, y cualquier Gobiernu con estos respaldos "ye inviable" y Sánchez sábelo "y da-y igual".

El secretariu xeneral de Ciudadanos, José Manuel Villegas, esixó güei que’l presidente del Gobiernu convoque elecciones xenerales nes selmanes vinientes y alvirtió de que, en caso de nun facelo, impulsará la so propia "moción de censura instrumental namái pa convocar elecciones".

Al respective a la moción de censura presentada pol PSOE, Villegas dixo que s’opondrán a una moción presentada "col sofitu de separatistes y populistes", poro, pidió al líder del PSOE, Pedro Sánchez, que retire esa moción y dio anuncia de que sedrá Ciudadanos el que la presente cola fin de convocar elecciones si Rajoy nun lo fai.

"Nesa moción -del PSOE- nun va tar Ciudadanos", recalcó Villegas, que consideró que la solución a la crisis provocada pola "corrupción del señor Rajoy nun son nin les prises nin l’oportunismu del señor Sánchez".

"La solución nun ye que’l señor Rajoy salga de la Moncloa pa qu’entre’l señor Sánchez", dixo Villegas pa dicir que si Rajoy "s’enroca y nun da voz a los españoles" impulsarán una moción de censura instrumental "namái pa convocar les elecciones".

Per parte de so, el líder de Podemos, Pablo Iglesias, aseguró que nun pondrá condiciones a Pedro Sánchez p’apoyar la moción de censura del PSOE escontra Mariano Rajoy y "desaloxar a los corruptos", anque alvirtió al candidatu socialista de que pa gobernar tendrá que falar "con muncha xente".

En rueda de prensa na sede de la formación morada, Iglesias espresó la so satisfacción pola decisión de los socialistes y dixo que’l sí de Podemos pa la moción "yá lo tienen", pero esplicó que, amás de "desaloxar a los corruptos del aparatu del Estáu", España tamién necesita un "programa social".

Eses polítiques deberíen servir, al so entender, pa garantizar les pensiones, xubir el salariu mínimu, asegurar la protección de los desempleaos, igualdá retributiva, la igualdá de los permisos de paternidá y maternidá, el control del mercáu d’alquileres y fomentar el diálogu en cuestiones territoriales.

En tou casu, Iglesias afirmó que nun ye a él al que correspuende presentar un programa de Gobiernu, sinón al PSOE, al que se remitió p’aclarar esti aspectu na so breve comparecencia, de malapenes cinco minutos y na que namái almitió tres entrugues.

"Nosotros tamos dispuestos a poner los nuestros votos pa desaloxar al PP del Gobiernu y, dende güei, dicimos qué ye lo qu’a xuiciu de nós necesita España", manifestó.