El centenar d'españoles evacuaos reconocen el so aliviu pero nun escaecen Ucraína

Albares pide a los españoles salir "darréu" de Rusia pol pieslle del espaciu aereu

El grupu de los 106 españoles y ucraínos evacuaos dende Ucraína llegó esti llunes nun avión fletáu pol Gobiernu al aeropuertu de Barajas, onde fueron recibíos pol ministru d’Asuntos Esteriores, José Manuel Albares.

“Güei ye un día de gran aliviu pa los españoles que pudimos sacar del horror de la guerra enantes de tener que zarrar la embaxada por falta de seguridá”, aseguró’l ministru dempués de falar con dalgunos de los repatriaos que, a les 6:00 hores, cargaos con mochiles y pequeñes maletes y colos güeyos encarnaos pola falta de sueñu, aterrizaron en Madrid vinientes de Cracovia (Polonia).

“Son tantos casos de dolor y histories humanes de lo que queda atrás”, comentó Albares dempués de falar con una pareya que viaxa con un ñácaru de dos díes, una ucraína que dexó a so madre atrás y cuatro monxes que s’ocupaben de neños ucraínos, dixo.

Entá queden españoles n’Ucraína. Ye’l casu del ilicitanu Luis Delgado y la so muyer, que lleven dende’l martes pasáu en Zaporiyia, al sur d’Ucraína.

Llegó pa participar de xuez nuna competición internacional de baille y lleven cinco díes ensin salir del hotel. Ayeri pudieron contactar per primer vegada col Ministeriu d’Esteriores.