El númberu de denuncies de sumisión química cuasi se duplicó l'añu pasáu

El Gobiernu meyoró los kits pa la obtención de muestres que dexen axilizar l'análisis toxicolóxicu

L’añu pasáu 1.700 persones, les más muyeres, denunciaron ser víctimes de sumisión química, ye cuasi’l doble qu’en 2021.

Son los casos que llegaron al Institutu Nacional de toxicoloxía. Calcúlase que se confirma ún de cada tres análisis. Y eso, qu’a les víctimes cuésta-yos denunciar. Asina lo asegura Antonio Alonso, director del Institutu Nacional de Toxicoloxía y Ciencies Forenses.

La principal recomendación énte esos casos ye dir darréu a un centru sanitariu. Llueu los forenses tienen un kit pa la obtención de muestres que fueron meyorando nesta última remesa y que dexa axilizar l’análisis toxicolóxicu.