España algama’l millar de contaxaos pol coronavirus

El Gobiernu vascu suspende les clases en Vitoria hasta’l 23 de marzu pa intentar frenar el contaxu

Los casos por coronavirus n’España ronden yá’l millar, con Madrid y el País Vascu como comunidaes más afectaes. Son les que más esmolecen nestos momentos y ta estudiándose plantear midíes específiques pa estes dos comunidaes, onde se rexistraron tresmisiones locales.

La xunta del Comité d’Evaluación y Siguimientu del Coronavirus tuvo güei presidida por Pedro Sánchez. El presidente dio anuncia de que tán trabayando nun plan de choque escontra la enfermedá pal que quier contar, diz, colos axentes sociales y pide serenidá.

Per parte de so, el líder del PP, Pablo Casado, reclamó al Gobiernu un "plan de choque" con midíes "urxentes", al traviés de Real Decretu, énte’l coronavirus.

Apurre la mano al Executivu p’aprobar esi plan, con 10 midíes, que tien qu’inxertar rebaxes fiscales y la devolución de los 2.500 millones d’euros a les comunidaes pol IVA.

El Gobiernu vascu suspende les clases en Vitoria hasta’l 23 de marzu pa intentar frenar el contaxu

Decisión de gran impactu la que tomó güei’l Gobiernu vascu. Suspendió les clases en tolos centros educativos de Vitoria 15 díes.

Hasta’l 23 de marzu viniente, guarderíes, colexos, institutos y universidaes tarán zarraos pa intentar frenar l’espardimientu del coronavirus.

Vitoria, con 255.000 habitantes, ye’l principal focu de contaxu del País Vascu, que yá suma 148 positivos de coronavirus, 46 más qu’ayeri.