Esperanza Aguirre dimite "engañada y traicionada" por Ignacio González

"La mio manera de concebir la política llévame a asumir la responsabilidá que me correspuende"

Esperanza Aguirre anunció güei la so dimisión como conceyal y vocera del PP nel Ayuntamientu de Madrid, asegurando que se siente "engañada y traicionada" por Ignacio González, quien fuera la so mano derecha y el so socesor na Presidencia de la Comunidá de Madrid.

Esperanza Aguirre fizo estes declaraciones nuna curtia comparecencia de tres minutos na sede del grupu municipal del PP na que, ensin almitir preguntes, anunció que dexa'l so cargu de conceyal y de vocera tres la detención y l'ingresu en prisión el vienres pasáu del ex-presidente madrilanu Ignacio González pol casu Lezo.

Según declaró, a González pidió-y esplicaciones cuando dellos medios de comunicación asoleyaron sospeches sobre les sos actuaciones, y ésti dió-yles en privao "de manera fonda".

La hasta güei vocera municipal del PP dixo que tres aquelles esplicaciones nun vixiló "más" y asegura que, anque les informaciones qu'apaecen nel autu nun son una "prueba definitiva" de la culpabilidá del ex-presidente madrilanu, la so "manera" de concebir la política llévenla a dimitir.

"La mio manera de concebir la política llévame a asumir la responsabilidá que me correspuende por nun vixilar a Ignacio González y nun descubrir enantes lo qu'agora, depués d'años d'investigación, descubrieron la Guardia Civil y el xuez", espunxo Aguirre.

De González dixo amás que foi una persona del so "máximu enfotu" a quien conoció nel Ayuntamientu de Madrid cuando esti yera funcionariu nos años 80, y recordó que foi ella la que lu nomó subsecretariu d'educación cuando yera ministra, y que como presidenta autonómica nomólu vicepresidente.

"Los ciudadanos tienen derechu a pidir que los políticos asumamos tola nuestra responsabilidá con dignidá, ensin tardanza y ensin escuses y yo tengo como norma de conducta nun eludir nunca les mios responsabilidaes y por eso presento la mio dimisión", concluyó Aguirre, visiblemente emocionada, p'abandonar depués la sala ensin aceptar preguntes de los periodistes.

La ex-presidenta madrilana, que nun facía declaraciones desque'l pasáu xueves foi a declarar como testigu nel casu Gürtel, anunció la so decisión nuna comparecencia convocada poco depués de qu'Ahora Madrid y el PSOE anunciaren que pidiríen la dimisión nel Plenu del miércoles.