L'engranaxe electoral ponse en marcha'l llunes

Cuartes elecciones xenerales en cuatro años

La primer fecha marcada en colorao nel calendariu ye'l llunes 23 de setiembre. Esi día van desaniciase les Cortes, el Congresu y el Senáu, y un día dempués va asoleyase la convocatoria d'elecciones xenerales.

Los partíos tienen de plazu hasta mediaos d'ochobre pa formar les sos llistes, el día 15 van asoleyase nel BOE. La campaña va entamar el 1 de payares, y va durar malapenes ocho díes. Una rebaxa al respective de los 16 avezaos, en virtú d'una reforma llegal de 2016 pa esti tipu de casos de repetición electoral.

Les de payares van ser les cuartes elecciones xenerales en cuatro años, y la segunda vegada nel actual periodu democráticu en que se repiten los comicios. L'anterior, la primera, foi apocayá, en 2016, cuando Mariano Rajoy nun se presentó a la investidura y Pedro Sánchez fracasó nel so intentu.

El costu de les nueves elecciones ye de 140 millones d'euros, y el Gobiernu tendrá qu'aprobar una ampliación del gastu pa encarar esi costu.

Solo Correos lleva'l 40% d'esi presupuestu, pa facilitar el votu a distancia. Nestos 140 millones nun s'incluyen los gastos, les subvenciones a los partíos políticos que, al tratase d'una repetición, van vese amenorgaos un 30%.

Va llamase a les urnes a unos 37 millones de persones en toa España. N'Asturies, son aproximadamente 974.000, que van votar nos 600 colexos distribuyíos per tola rexón.