Luis Bárcenas, condenáu a 33 años y cuatro meses de cárcel pola primer dómina de Gürtel

El PP y Ana Mato, condenaos por llucrase de la trama

L’ex-tesoreru del PP Luis Bárcenas foi condenáu a 33 años y cuatro meses de cárcel na macrocausa pola primer dómina de Gürtel (1999-2005) poles mordíes qu’algamó al traviés de la trama, cantidaes que, xunto al dineru que se cree que sacó de la caxa B del partíu, lleváronlu a atesorar 48,2 millones d’euros en cuentes en Suiza.

La so muyer, Rosalía Iglesias, pa la que la Fiscalía pidía 24 años de cárcel, foi condenada a 15 años y un mes por usar, en connivencia col so home, procedimientos pa ocultar les rentes de so y les del so home, ingresando una parte d’elles n’efectivu en cuentes de la so titularidá abiertes tanto n’España como en Suiza y simulando consiguir eses perres de les ventes de cuadros.

L’alta condena impuesta a dambos implica que deberán ingresar na cárcel. Bárcenas, que yá pasó 19 meses en prisión preventiva por mor de qu’apaeciera’l dineru que tenía oculto en Suiza y al que la Fiscalía pidía 39 años de cárcel, tendrá, poro, qu’entrar otra vuelta na cárcel pa cumplir la primer condena que-y impón l’Audiencia Nacional pol casu Gürtel, del que salió’l casu sobre la caxa B del PP reflexada nos sos famosos papeles y qu’entovía ta pendiente de xuiciu.

El PP foi condenáu, como persona xurídica, a pagar 245.492 euros por lucrase de Gürtel al traviés de los sos ex-alcaldes en Majadahonda y Pozuelo, Guillermo Ortega y Jesús Sepúlveda, y a la ex-muyer d’esti últimu, la ex-ministra Ana Mato, tamién foi condenáu al pagu de 27.857 euros por beneficiase de los regalos que’l so home daquella sacó de la trama.

Ye la primer condena a un partíu políticu como responsable civil nel llucru algamáu por una trama corrupta, porque, según la sentencia de l’Audiencia Nacional, hebo "un enriquecimientu illícitu en perxuiciu de los intereses del Estáu", mientres que los actos delictivos de la trama "algamaron beneficios económicos cuantificables al PP".

No que cinca a Ana Mato, la sección segunda de lo Penal recuerda que la ex-ministra, cuando entovía taba casada en réxime de gananciales con Sepúlveda -que foi condenáu a 14 años y cuatro meses de cárcel-, disfrutó de "viaxes y otros servicios que’l Grupu Correa dio a la so familia" como regalos y celebraciones de cumpleaños.

L’Audiencia Nacional llibró a Álvaro Pérez Alonso, El Bigotes, y a otros siete acusaos nel xuiciu pola primer dómina de la trama Gürtel, sobre l’actividá de la rede mafiosa liderada por Francisco Correa ente los años 1999 y 2005.

Amás d'El Bigotes, al que la Fiscalía pidía una pena de cinco años y dos meses de cárcel, fueron absueltos Luis Valor San Román, ex-director del Ayuntamientu de Majadahonda; Jacobo Ortega Alonso, hermanu de Guillermo Ortega; José Antonio Sáenz Jiménez, ex-conceyal de Pozuelo d’Alarcón, y cuatro persones venceyaes a empreses de la trama: Carmen García Moreno, Antonio Martín Sánchez, Juan Ignacio Hernández Rodríguez y Inmaculada Mostaza.

El Bigotes ta consideráu’l "home en Valencia" de Francisco Correa y responsable d’Orange Market, filial valenciana de Special Events -empresa d’eventos de Correa-, qu’algamó abondos contratos públicos y actos electorales na Comunidá Valenciana.